.. بين صفحتين.. بقلم.. عبير محمود

                                بين صفحتين

فى كتاب قديم

على رف جوه مكتبة

أوراق ورود

عدى عليها كتير سنين

ولسه ريحة عطرها

فواحة بتقول مرحبا

وقصيدة فى سطورها

الكلام

بيبوح بحبه وبالغرام

فيها المشاعر بالفرح

وب الآلام متشربة

لما الإله 

فرق وشاء

تختلف طرق الحياه

مايكونش بينهم انصبة

اصحابها  مين

مش معروفين

من غير أسامى وعناوين

تايهين فى حضن الذكريات

وللى فات

عاشوا الحنين

ما بين وبين 

والحيرة صعبة ومتعبة

وهى دى

حكاية كل العاشقين

تلاقيها مكتوبة بأنين

بين صفحتين

فى كتاب قديم

على رف جوه مكتبة

عبير محمود